買買買買買左乜之 美容儀器篇!!!

好懷念第一間去嘅美容院　美容師手勢超級好

可惜轉左老闆　美容師不知所蹤

去到上年仲耳仔軟比緊錢美容院

決定以後淨係去醫生到做醫美同投資喺美容儀器到

我對美容儀器真係有莫名好感

呢排我買左咩呢

首先係Nuface系列!!!

 分別買左Trinity 碌碌同紅光同 Nuface fix

碌碌都頗為好用，電流又算唔上叫痛，但係!!!要搽層gel先可以開始碌碌碌!!!我咁懶，想起又好耐冇用到，喺elegant beauty網購返黎～

仲買左呢個紅光頭，我喺眼部專用頭同紅光頭掙扎左好耐買邊個好，最後決定買紅光頭因為唔使搽野洗完臉就用得同埋係減少皺紋，不過我都好少用，記得第一次用完後第日臉甩曬皮，哈哈哈哈哈哈哈，不過之後都唔怕啦，可能要下下決定用喺頸到。

買完紅光頭後我極度後悔冇買眼部專用配件，冇咩因為只不過我一向想咩都有齊嘅裝備撚，但係唔想再買配件因為Nuface 啲機質素都幾流，成日換配件時都心驚驚驚佢斷，所以見呢個nuface fix眼仔碌碌時就襯cultbeauty 8折時買左～好方便～幾好用～又細細碌有蓋

跟住出場嘅係Tria 家族

又襯Cultbeauty 8 折買左 Tria Hair Removal Laser Precision，因為想自己打加拿大，經過多次美容院脫毛療程後，下面淨返唔是太多餘孽，我決定自己清理佢地，折左都唔平，其實我有另一部見毛機，但想試試激光嘅厲害，打打加拿大咁細嘅位置都可以，唔算用太多時間，有時無情情一兩下幾痛下，不過大多數時間都係可接受範圍。

跟住係呢部Tria SmoothBeauty laser，實不相暪我係喺淘寶代購買入呢部野，因為我用自己方法完全買唔到，曾經喺英國官網見到超好deal係買呢部送眼部激光戈部野，唉!!英國代購話差電野上唔到飛機買唔到，飲恨!!!! 嘩，真係好鬼痛打起上黎，第一檔ok，第二檔第一次打時真係覺得好痛，打完臉兒紅曬，男朋友問我咩事，跟住尋日試打第3檔，咦，冇想像中咁痛wo，非常可接受範圍，不過打完臉兒比之前仲耐一啲，我覺得呢部野幾方便，因為係洗完臉乜都唔搽就可以打，比起nuface搽完野碌碌完又要洗臉方便好多，NUFACE仲要碌好耐WO，不過電流同激光完全兩回事，呢個更需要事後保養，效果都相當唔同方向，睇你想要咩效果。對我黎講，因為我鼻同鼻附近啲皮膚毛孔好大，一向視為眼中釘，而家疫情更加冇可能會剝口罩去攸ＴＲＥＡＴＭＥＮＴ啦，所以衝動咁買左，睇下幾個月後有冇明顯效果~

最後就係呢部Foreo ESPADA Blue Light Acne Treatment藍光機～之前未食A酸之前買，由於食A酸療程期間都冇暗瘡，皮膚太滑，入左冷宮好耐，係搬屋時先搵返醒起買過呢舊野，適逢食完A酸，偶然都會生啲小暗瘡，我都會照照

BYE~~~~~~~~~~~~~~~~~~~~~~~~~